الحب قضاء وقدر

#كرررووونيك_ررروووعة 😍

#الحلقة__1

تزوجت زواج تقليدي وانا فعمري 18 سنة خسرت الباك وحبست وبابا زوجني باول واحد جا تقدملي عييت نبكي ونندب قالي خلاص كيمديتلهم الكلمة والله منولي فهدرتي جات يماه شافتني و ختو وعجبتهم وكدا قالهم بابا لازم الطفل يجي يشوف قالولو الطفل يحشم بزاف وراه خدام عسكري بعيد قاللهم الله يسهل لااازم يجي شوف

قالو صح نجو ندفعو ونديرو الخاتم ونهار يجي نجيبوه فاللهم اوك 

انا كرهت حياتي تمنيت ندي واحد نبحو وندير خطبة عصرية ويجي هو يديرهالي مي خرج كلش تقليدي 🥲😔 وعكس واش تمنيت فاتت 15 يوم وجاو دارهم دارولي الخاتم لبست قفطان مكياج شباب وجات جداتو عجوزة كبيرة دارتلي الخاتم انا قبلت بمكتوب ربي قلت معليش 

الحق يقال جابولي كل خير الله يبارك ومع هد شي كلش عطاوني 3 ملاين من فوق قالولي هدي ليك نتي ديري بيها واش تحبي انا فرحت ومن جيهة متشوقة نشوف هد بنام كيفاش داير  

فات شهر بتمام عيط باباه لبابا وقالو الطفل جا وراح يجي غدوة إن شاء الله هو ويماه ويديرو رئية شرعية انا خفت خخخفت ايلا مايعجبنيش ومايخرجش كيف ما حاب قلبي  الغدو نضت دوشت يما مخلاتنيش ندير مكياج قاتلي ادخلي هاك ابنتي ولبست روبة مستورة ودرت الشعري كوتشوvال شعري طويل ونوار شباب قالولي راكي تباني شابة جات يماه وهو دخلو لصالون شوية عيطتلي يما قاتلي ادخلي دخلت وقلبي يخبط فـ 100 غير دخلت رفدت لقيتو يشوف فيا و قالب وجهو تقول هو لي مسيفين عليه مشي انا دخلت دارلي السلام قتلو سلام واش راكي صفا صفا ونتا حمدالله وسلمت على يماه وجمعت وهو غير ساكت ويشوف فالارض وانا نستنا غير وقتاش يشوف فيا 😭 .. يتبع

#الحلقة__2

صراحة حسيتو مشي مقيمني خلااااص حسيتو جاي ذراع عندنا غاضتني عمري 😔 وقلبي تزير عليا 😭

نطقت يماه قاتلو محمد شبيك حشمان وشافت فيه وحد الخزرة يالبنات عينيها خرجتهم فيه 

شاف فيها وقاللها ايه يما وضحك ههه واش نقوللها تعرفيني نحشم 

قاتله سقسيها اسمها وتسقسيك تعرف عليها باش نشورو 

شاف فيا وبتسم معايا ابتسامة تاع بسيف قالي يخي اسمك أنفال قتلو ايه قالي انا محمد فعمري 28 سنة ونتي قتلو 18 سنة قالي الله يبارك صغرورة وضحك انا قتلو الله يسلمك وبتسمت ☺️ 

قالي : انا انسان عادي نخدم عسكري الله غالب ملقيت عليها وين رحت ڤاجيت وراني خدام في بلاصة بعيدة برج باجي مخطار بقالي هد العام ونتميتا إن شاء الله وساكن مع دارنا وراني عاد نكمل فسكنتي راح تعيشي مع دارنا بيلاما كملناها أن شاء الله قتلو معليش متشرفين وان شاء الله قالي عجباتك الخاتم قتلو ايه قالي وريهالي وبتسم ☺️ قتلو شوف قالي الله يبارك بصحتك من بعد قلب وجهو ليماه قالها يما نجمو نروح عندي صوالح وراني مزروب انا قلت فقلبي : شبيه مزروب هدا 

قاتلو اوك : ناضت عنڤتني وسلمت عليا قاتلي نتي بنتي والله متخافي نديرك في عينيا جات يما قاتلها وين بلخف قاتلها الله غالب راهو مزروب قالك عندي صوالح نقضيهم قاتلها اوك معليش وجا هابط من درج عيطتلو يمااااه 

محممممد 🙂 كيف هد الايموجي انا وخفتها قاللها ايه يما شافت فيه ومنعرف واش دارتلو بيدها 

قالها اااااه صح والله نسيت وجبد 500 الف من جيبو وقالي هاكي انا حشمت نحكمهم قاتلي يماه هاكي بنتي حق شوفة ☺️ انا فرحت في قلبي حوجيانة 3 ملاين و 500 نشري تلفون 😂 تاعي كان كامل مكسر 

الصراحة ستنيتو يجبدلي على تلفون ويقولي نشريلك ولا عطيني رقم مي وااالو تقول قلبو ميت .. يتبع

#الحلقة__3

انا صراحة عجبني مي قلقني حسيتو صامط وحسيت يماه تحكم فيه المهم وليت ليل كامل نحلم بيه وقلت خلااص تاليتها زواج بالاك يخرج على حساب قلبي و سلمت امري للله فاتت ايام بابا زادني مليون وشريت تلفون شباب بوست جديدة فتحت فايس جديد وبلعت القديم قلت بالاك يجي نهار يدوموندي يحكي معايا كنت نظل نحوس على فايسبوك تعو وملقيتوش ڤاااع حتى دومونديت من خالي صغير فعمرو 20 قتلو شوف كيفه تدير ودبرلي فايسبوك قالي صح عطيني نوت فاميل وكاش واحد من خوتو و ولاية ضك نعيا ونجبدو من عند فاميلتو عطيتو ليستحق وقعدت نستنا فاتو 2 جور باش عاود عيطلي قالي نورمالو راني لقيتو وبعتلي كابتور تعو انا فرحت لقيتو مسميه اسم ڤاع مخلط وداير فوطو تعو غيل دخلت لقيتو دابر اونكوبل انا قلت بالاك كان اونكوبل مع كاش طفلة ونحاها دخلت نقرعج فليكومونتار وليجام لقيت تقريبا ڤاع منشورات توع طفلة وحدة برك دايرتلو جادور فيهم انا مهمتميتش سيرتو مين عندو مدة مشي طالڤ حاجة جديدة قلت بالاك كاش وحدة وخلاص بقا قلبي ياكل فيا ونقول نبعتلو ولا نووو نبعت ولانووو فاتو شهور وانا مترددة باش نبعتلو حتى وين صبن قلت خلاص والله نبعت وليصرا يصرا بعتلو انفيطاسيو وقعدت نستنا ياكسيبتي نستنا نستنا واااالو فاتت سمانة وهي غير معلڨة عاودت آنيليتها ورجعت نبعتلو وبعت مساج تاني قتلو سلام محمد غير 5 دقايق اكسيبتا وردلي انا دخلت بروفيل ولقيتو داير ستات يشوفوه غير ليزامي وكاتب فيه حسنو عوني الضربة جاتني من الوالدين 💔 وطفلة نفسها مكومونتيا ربي يفرج حبي 😭 ودايره هد الايموجي انا قلبي ضرني قلت واش قصدو زعما 

دخلت فلمساج قالي سلام شكون ؟؟ قتلو أنفال قالي شكون انفال قتلو خطيبتك قعد وحد 5دقايق باش ردلي رجعت لبروفيلو لقيتو مسح ستات ليقريتو و بزاف تاني وحدين ايا قالي ااا واش راكي صفا هدرنا عادي قالي هدا الفايس تعك قتلو ايه وبقينا نحكو عادي ونڨصرو مي يطول باش يرد عليا قعدنا تقريبا سمانة وحنا نحكو مي جامي طلب رقم تاعي و مام تاني يطول باش يردلي حسيت طيحت بروحي .. يتبع

#الحلقة__4 

قتلو محمد نسقسيك قالي ايه قتلو راني عاجباتك ؟ ضحك ههه قالي علاش ؟ قتلو حسيتك مش عاجبك هد الزواج كااامل سكت مردليش وحد 5دقايق قالي مديلي رقمك نحكي معاك فوحد سوجي والقرار قراراك نتي مديتلو وانا قلبي يخبط خفت كاش ما يقول . عيطلي الو صفا وكدا قتلو اتفضل قالي احكمي بلاصة وحدك مفيهاش ديرونجمو وسمعيني مليح واش راح نقولك قتلو اوك 

قالي اسمعي يا بنت الناس انا والله ماني ناوي فيك حاجة مش مليحة انا نحب طفلة من حيت كما نقراو فليسي وسيام وبحكم كبير عليها غير بعام يما قاتلي والله متدخل داري شارفة 26 عام ليكيفها ولدو و عاودو انا غاضتني وقنطت وقتلو وانا علاش دخلتوني فحكايتكم قالي اسمعيني لتالي متتقلقيش انا والله غير نديرك في عينية وجامي نحڤر ولية كيف ما نخاف على خوتي نخاف عليك انا ضرك منجمش نجي من ورا يما ونرفضلها طلب تعها وتغضب عليا 

قالو نسقسيك قالي تفضلي قتلو مزالك تحكي معاها ؟؟ قالي ايه 

زدت هلكت بالبكا وقتلو وانا واش ذنبي

قالي اصبري معايا غير بشوية و نبعدها على طريقي هي تاني ولية كيفك وقارعتلي عوام عواااام باش نتزوجو من بعد نبلوكيها ومنزيدش نهدر معاها قالي انا راني حاب هي تفهم روحها وتبعد عليا باش مانضرهاش 💔😭 وتدعي عليا وتخرج في بناتي مستقبلا قتلو اوك راح نصبر معاك مي اذا راك عارف روحك متقدرش تنساها وتعييني معاك غير فوتني الله يخليك وبطل عليا 

قالي انا منجمش نبطل اذا حابة نتي بطلي و والله منقولك رجعيلي حتى حاجة ادي كلش من حقك حتى الخاتم 

قتلو راك تشوف فيا طماعة واقيل معندي مندير بصوالح وخاتمك 

قالي خسارة عليك 

قتلو صح وباي وكوبيت وقعدت نبكي نبكي

رحت ليما حكيتلهااااا كللش قاتلي عنده صح كون يبعد عليها بضربة تدعي عليه وتقولو تمسخرت بيا .. يتبع

#الحلقة__5

وتخرج في ولادكم قتلها مي انا منيش باغية نتزوج بواحد مشي حابني

قاتلي ضك نحكي مع باباك ...راحت تحكي مع بابا حتى سمعتو يعيط ويسب من بعد عيطلي قالي انفااااال ارواحي دخلت قالي اسمعي انا راجل وعندي كلمتي وما نبطلش يالوكان على قبري إذا بطلو هوما تبارك الله مابطلوش ديري نية وسكتيني ويزيد واحد يجي عندي ويهدر معايا والله نباصي عليكم 😡 قتلو صح وهبطت راسي وخرجت 

رحت حطيت راسي على المخدة وقعدت غير نخمم نخمم نخمم من بعد دخلت للفايسبوك ورحت عند هديك طفلة بعتلها انفيطاسيو ومساج كتبتلها اقبليني يا طفلة انا خطيبة محمد 

وحد ساعة وقبلتني قاتلي هيه واش حبيتي قتلها كفه واش حبيت تسما على بالك بلي خاطب قاتلي ايه ومن بعد قتلها اسمعي المكتوب محبش يجمعكم مع بعض وراه جا خطبني وانا منجمش نعيش معاه ونتي مزالك لاسقة فيه 

قاتلي واش من لاسقة فيه هداك حبيبي وعشرت سنين احبي ونتي جيتي غير لبارح وحابة تبعدينا غيل روحي ربي يهديك يالوكان رآه متزوج بيك مشي غير خاطبك وعندهم عرام ذراري والله مانطلڤه هداك حياتي ايلا راح هو انا شكون بيا يا ختي 

ومادابيك نتي ليتبعدي عليه بالاك ربي يهديها وتخلينا نتزوجو

قتلها مالا اسمعي : انا ماراحش نبطل وهو مهوش حاب يبطل وفي زوج رانا حبين بعضانا وهو قالي انا راني باقي معاها غير على جال كيخفتها تدعي عليا وراه يقارعلك نتي لي تبعدي عليه فهمتي مالا غير جبدي بعيد 

قاتلي شدي في داك الخيط وضحك هاك 😂 وبلوكاتني 

انا الصراحة غاضتني عمري 😔 وحد شوية هاك وعيطلي محمد رديت قالي واش كاين وشكون قالك روحي وهدري معاها ونتي واش دخلك وسبني وكوبا قالي اسمعي عجبك الحال معجبكش نتي ليبطلي عليا وخطينا برحمة ربي 

انا بكيت بكيت بكيت ،😭😭 قلت تسما كون نروح عندو يدير كتر من هاك رحت عيطت لخالي وحكيتلو كلش ومديتلو نمرو راح عيطلو ودابزو وقالو تبطل عليها بسيف عليك وصرات كحلة كحلة 😭 

محمد راح عيط لبابا وقالو شوف بنتك رسلتلي خالها وسبني وقالي بطل على بنت ختي بسيف 😡 يااااالبنات 😭 هداك النهار بابا دخلني فشومبرى وبلع الباب وحكم التيو تاع الڤاز وزرڤني زرڤني زرڤني لحمي تشوه وقالي نديك عند طبيبة نشوفك اذا مزالك عذراء مدامك مكيش حابة زواج راكي دايرة حاجة 😭 الموت شفتها داني عند طبيبة والحمدلله مفيا والو .. يتبع

#الحلقة__6

 فاتت سمانة هاك صورت كامل ليطراس تاع تيو وصورت البلايص ليزرڤني منهم وبعتهم ل خطيبي وقتلو حسبي الله ونعم الوكيل فيك بسبتك وبسبت مدامتك انا راني نخلص وإذا دعوتها مخرجتش فيك دعوتي انا ليغادي تخلص فيك غير شافهم وقرى لمساج حرق تلفون بالعياط محبيتش نرد عليه بعتلي مساج فالفايس قالي وراسك غيل تردي نحكي معاه وسمحيلي رديت عليه قالي والله اسمحيلي مكنتش حاب يصرالك هاك و والله والله صاي راني بلوكيتها ونوعدك وعد شرف منزيدش نحكي معاها ونبدا صفحة جديدة وكدا شبعني خرطي فخرطي وخلاني نأمن قتلو اوك. كدا ورجعنا نحكو ليل ونهار ونڤصرو وبلوكاها قتلو واش رايك دراهم ليتخسرهم ودراهم لينخسرهم نلايموهم ونكملو شكنتنا بلخف ونروحولها قالي اوك انا شريت ڤاع لييلزمني ودرت حاجة برك تاع ذهب سنسلة برك صغيرة و دراهم لخرين مديتهملو كامل و مع دراهم هو تاني تاع التصديرات وذهب بدأ يكمل فسكنة بيهم فات عام برك هو دا كونجي و تميتة في تيبازة قريبلنا بزاف يجي كل وقت درنا عشى برك خفيف كريت لاغوب برك وجا داني قعدنا شوية برك فدار للفال جاو سلمو عليا فاميلتو رحنا لوتال فوتناها شابة قعدنا سمانة مرجعناش لدار من بعد شورنا عند يماه كان مزال السكنة مكملتش ڤاااع فات شهر شباااب بزااف من بعد راح خدم ورجع جا فالويكاند كان كل ويكاند يجي فوتناهااا شابة كان عندي تلفونو فيدي هو عندو رادمي جيت ندخل لتلفون غلطت درت كود اخر حتى شفت تلفون تفتح ملڤري مشي هداك الكود كان دايرة الواجهة الثانية لتلفون 

غير دخلت لقيت فايسبوك فاتحو باسم اخر و لقيت فوطواتها بالعرام وفوطواتها معاه متأمنوش دخلت للفايسبوك لقيتو يحكي معاها تم عرفت بلي هداك النهار مبلوكاهاش وبلي من داك النهار لليوم كل يوم يحكو مع بعض وحتى أنو تلاقا بيها شحال من مرة 😭😭😭 قلبي وجعني وجعني وجعني بزاف 😭 حتى وليت نبكي نبكي دخل لقاني نبكي قالي شبيك حبي شبيك قتلو بعد عليا يالكداب ياليمتحشمش ديني لدارنا ضك ضك قالي شبيك قتلو واش هدا واااش هدا وليت نبكي 😭 هو سكت مام با مطلبش سماح مني قالي اوك وجدي صوالحك نديك 😳 انا نخلعت فيه قتلو آمالا هاكا قالي ايه لمي صوالحك 

هو خرج انا لميت كلش و جا داني لدارنا طول الطريق وهو ساكت غيل وصلت قالي انزلي وحكيلهم ليحبيتي ميهمنيش انا مستحيل نسمح فيها حبيتي ولا كرهتي وتهلي في روحك انا قتلو ربي واكيلك ونزلت .. يتبع

#الحلقة__7

 نزلت طبطبت فتحت عليا يما دخلت نبكي عندها نبكي قاتلي مالكي ابنتي مالكي حكيتلها كلش كلش ولات تبكي معايا قتلها سمح فيا عادي قالي روحي ربي يسهل عليك ومنسمحش في مدامتي ونبحها 😭 غير جا بابا حكاتاو كلش عيطلو جا لدار وجات عندي عجوزتي قاتلي اسمحيلي ابنتي والله ارجعي وانا نتفاهم معاه راكي صغيرة وتتطلڤي واش يقولو عليك يخي مخصك والو رآه متهلي فيك قتلها نو مستحيل نولي لراجل مشي كافياتو 

ومحمد مع بابا فصالون قالو واش هدا انا مديتلك بنتي باش تتهلى فيها مشي باش. تدير لها هاك قالو أعمي بنتك من نهار ديتها جامي قتلها لا على حاجة بغاتها ولا على عفسة تشهاتها وهي شاهدة على. كلامي 

قالو مالا واش هداك ليدرتو

قالو عمي انا هديك عشرة عواااام وانا واعدها ويما وقفتلي في طريقي مخلاتنيش نتزوج بيها وراني ناوي نجيبها زاوجة والله بنتك متخصها حية إذا راهي قابلة نتزوج بزاوجة وتعيش معزة مكرمة وإذا مهيش حابة راح نطلق ونتزوج بطفلة لخرى 

قالو بابا ساااار هكدا ايا نوض خرج عليا برى خرج هو ويماه وراحو بقيت نبكي قالي بابا اسمحيلي ابنتي محبيتش نرد عليه ودخل لبيتو فاتت سمانة بعتلي مساج قالي القرار قرارك تقبلي نجيبها دوزيام فام ونعيشك كالأميرة متقبليش نطلقو ونتزوج بيها هي مرديتش عليه 

فاتت سمانة الزاوجة عرفت روحي بالحمل قلت ليما ويما قالت لبابا بابا عيط لمحمد قالو ارواح دي مرتك راهي بالحمل حرق تلفون بالعياط رديت بسيف قالي منيش مامن صك راكي انسات قتلو ايه قالي وجدي روحك نجي نديك قتلو مستحيل وإذا راك حابني نرجعلك لازم تمحي هديك من حياتك وكوبيت عليه فاتت ساعة بعتلي مساج قالي مالا اقعدي ربيه وحدك و ضك نبعتلك ورقة تاع طلاق 😭😭 انا نخلعت قلت لهد درجة رآه متأثر بيها وعامياتو سمح فيا انا و الجنين ليفكرشي الله لا تربحو بعتلي ورقة طلاق وبدينا فالإجرآت دخلت شهر 3 تم قاتلي طبيبة عندك توأم الله يبارك مي مزال يبان الجنس تعهم انا فرحت و غاضتني من جيهة أخرى وحنا كانت باقيتلنا جلسة ونطلقو قلت ليما وبابا عرف قالي أبنتي خلاااص راح تولي لدارك مكانش كيف عيطتلو قتلو عندي توأم قالي ربيهم وحدك قتلو راني قابلة نرجع قالي اوك و آنيلينا كلش ودرنا صلح ورجعت الصراحة تهلى فيا بزاف وكان يجيبلي كل خير وهو كان يظل يحكي معاها وقدامي نورمال وانا قلبي يتقطع 😭😭 فلول مين كان سكيمي مكنتش نحس مي ضك كيعرف بلي علابالي رجع يحكي معاها نورمال ويقوللها ضرتك رآها مسلمة عليك 

وانا من داخل نبكي وڤلبي برد عليه وكرهتو رجعت دايراتو انسان لاباس عادي وخلاص عايشة معاه لدرجة وليت مانحسش ڤاااع بمشاعر من جيهتو نهار ليولدت فيه كان هداك نهار عرسو 😔😔😭😭 هو يعرس وانا من القنطة والبكا على زهري مشي على محمد بكيت على مكتوبي برك ايا حكمني وجع وطرطقتلي السقيا وداتني عجوزتي وشيخي نولد وهو ومرته في لوتال خسر عليا آبال برك وزاد فوتهالي بوركتلي وزادت قاتلي عقوبة ليا أن شاء الله دعيلي وضحكت ههه قتلها ان شاء الله وكوبيت زادو عندي زوج بنوتات سميتهم قمر وشمس كانو احلى حاجة فحياتي ونهار جاو من لوتال قتلو اسمع ديني لداري ليسمحت في حقي على جال باش تكملها وهي تجي هنا قالي اسمحيلي منجمش راني حاب نعيش معاها حياتي وڤاع ليضيعتولها من حياتها نعوضها بيه ونتي ضك نشريلك ڤاع ذهبك ونردلك حقك كامل مكمل انا ملقيت منقول وانا نافسة بالزعاف والقنطة حليب صدري نشف 😭😭 ودعيت عليهم دعيت دعيت حتى شبعت 😔😔 رجع يظل عندها كتر مايجي عندي وكان يدي بناتي عندها ويروح ويجيبهم لليل ومرة جابها عندنا لدار عجوزتي جات عندي ولا تبكي تبكي وتعيط وتقطع في شعرها وتقولي سمحيلي سمحيلي 😭😭 حتى طاحت تغمت قاتلي انا سبابك وربي مغديش يسمحلي ڤاااع 

جا وليدها يجري يجري نوضها وشربناها الماء قاتله دي مرتك خرجها برى عليا و ولات تسب فيها وتقولها ياشارفة يا سراقة الرجال ناضت مرت راجلي ولات زعما تبكي وتقولها انا علاه انا علاه داها راجلي وشورو من داك نهار مزادتش جا ڤاع حتى جا وحد نهار قالي بنسلم على بناتي راني رايح نكري وندي مرتي لتيبازة قتلو الله يسهل عليك 

وقلبت وجهي ورحت قالي متزعفيش قتلو نت آخر همي منيش كامل حاسباتك كاين ولا مكانش غير روح الله لا تربحك

قالي خسارة عليك وقالي راح نولي وين مانجي بارميسيو هي نديها لدارهم ونجي عندكم قتلو تدير فيا بليزير متجيش ڤاع منستحقكش في حياتي كامل جاتو عادي وراح هو وياها فاتت قريب عام بابا توفى ربي يرحمو .. يتبع

#الحلقة__8_ و الأخيرة ... 

توفى بابا ربي يرحمو ويسمحلو انا راني مسمحاتو أن شاء الله ربي يسمحلو جا هو وياها عزاوني وزعما هو عنقني قدامها وقعد يواسي فيا وهي تشوف فيا كالمسمومة كون لقات تضربني تم فات شهر رجع جابها وجا لدار وجاب ختها وخوها صغير معاها قالهم نهار نروح للخدمة قعدو معاها ونهار نجي يشورو بسك ساكنة غير قراب تم بسك جوارين من بكري 

فات على حملها 4 شهور وطاحلها ورجعت حملت وكيتجي فاا4 يطيحلها طاحولها 5 مرات وفكل مرة يطيحولها فالرابع دارت فيا الهدرة بلي انا لي سحرتها جا راجلي وقعد يحلف فيا حلفتلو على الكتاب وقتلو تخرج في بناتي ايلا انا ليسحرتها 

والمشكلة كانت تروح عند طبة ويقوللها مفيك والو منعرف علاش راهم يطيحو وطاح عليهم وحد الربة رجعو كالطلابين مايسواو والو انا كان شيخي وعجوزتي متهلين فيا عجوزتي تخلص و شيخي يخلص يعطوني كل خير تقول بنتهم برد مشي كنتهم ويما وخوتي جامي نساوني ومام خوت راجلي تهلاو فيا وهوما رجعو كالكلاب تم لحد ضك ضرتي مزالو يطيحولها وراجلي رجع يجي عندي كل يوم يحلل فيا باش غير نشوف فيه قتلو وانا قايساتو فثقيل. بناتي كبرو وراني نربي فيهم وتعلمت الخياطة و ديت ديبلوم لاكوفاز وراني نخدم على روحي وزيانيت وبريت في صحتي رجعت نهبل 

مرات تغيضني مرت راجلي نقول نعرضهم عشا ونقوللهم سمحتلكم وربي يسمحلكم بالاك ربي يرزقهم ومرات قول خليهم 

❤️❤️❤️❤️❤️النهاية❤️❤️❤️❤️❤️